زمیں کو دیکھے کسی اور ہی نگاہ سے تو||غزل افضال نوید||اردو شاعری محبت||محبت کے موضوع پر بہترین غزل||Afzaal Naveed

غزل

افضال نوید

زمیں کو دیکھے کسی اور ہی نگاہ سے تو

 جو آشنا ہو کسی روز میری آہ سے تو

 

مرے وجود و عدم کا الگ زمانہ ہے

 کہیں پناہ نہ مانگے میری پناہ سے تو

 

 بہت عجیب زمانوں کا شور ہے مجھ میں

کہیں خموش نہ ہو جاۓ میری چاہ سے تو

 

 بجھا پڑا تھا کسی سبزہ مزار پہ میں

 مہک رہا تھا کسی نشئہ  گیاہ سے تو

 

یہاں کہ ہم نے کوئی عمر تھام رکھی تھی

 وہاں کہ دست و گریباں تھا روز و ماہ سے تو

 

نشیب عمر میں شاید تجھے خیال آۓ

غبار کھینچ بھی سکتا تھا میری راہ سے تو

 

یہیں کہیں میری مٹی میں بیٹھ جاۓ گا

 نکل گیا بھی جو میرے دل تباہ سے تو

 

بہاۓ آب نے کوئی تو رہ پکڑنی ہے

 گناہ اور کرے گر بچے گناہ سے تو

 

حصار شام و سحر میں گریز پا کیوں ہیں

 نوید! تجھ سے مہ و مہر ، مہر و ماہ سے تو